ఎర్రుపాలెం – చెరువుమాధవరం మధ్య మూడవ లైన్ ను విద్యుదీకరణతో పాటు పూర్తి చేసి ప్రారంభించిన దక్షిణ మధ్య రైల్వే
సాక్షిత ఉమ్మడి ఖమ్మం బ్యూరో చీఫ్:
విజయవాడ – కాజీపేట ట్రిప్లింగ్ మరియు విద్యుదీకరణ ప్రాజెక్టులో భాగంగా-
దక్షిణ మధ్య రైల్వే , ఎర్రుపాలెం – చెరువుమాధవరం రైల్వే స్టేషన్ల మధ్య 16.6 కిలోమీటర్ల పొడవునా విద్యుద్దీకరణతో పాటు మూడవ లైన్ను పూర్తి చేసి ప్రారంభించింది. ఈ విభాగం గ్రాండ్ ట్రంక్ రూట్లోని ముఖ్యమైన మూడవ లైన్ ప్రాజెక్ట్ విజయవాడ – కాజీపేట ట్రిప్లింగ్ & విద్యుదీకరణ ప్రాజెక్ట్ లో భాగంగా పూర్తి చేయబడింది . విజయవాడ – కాజీపేట మధ్య విభాగం దేశంలోని దక్షిణ ప్రాంతంతో ఉత్తర భాగాలను కలిపే గ్రాండ్ ట్రంక్ మార్గం వెంట ఉన్న అత్యంత కీలకమైన రైలు మార్గం.
దక్షిణ మధ్య రైల్వే పరిధిలో విజయవాడ – కాజీపేట విభాగం ఆంధ్రప్రదేశ్ & తెలంగాణ రాష్ట్రాలలో విస్తరించి వుంది . ఇది అత్యంత రద్దీగా ఉండే మార్గాలలో ఒకటి మరియు అన్ని దిశల నుండి దేశంలోని తూర్పు భాగాలు మరియు దక్షిణ ప్రాంతాల వైపు నిరంతరము ప్రయాణీకుల మరియు సరుకు రవాణాకు సాక్షిగా నిలుస్తుంది . ఈ కీలక మరియు అధిక రద్దీ విభాగంలో రద్దీని తగ్గించడానికి, విజయవాడ – కాజీపేట ట్రిప్లింగ్ & విద్యుదీకరణ ప్రాజెక్ట్ 219 కి.మీ (ఆంధ్రప్రదేశ్ – 35 కి.మీ. & తెలంగాణ – 184 కి.మీ) దూరం మేర పనులు చేపట్టేందుకు రూ. 1,952 కోట్ల అంచనా వ్యయంతో మంజూరు చేయబడింది. విజయవాడ న్యూ వెస్ట్ క్యాబిన్ – చెరువుమాధవరం క్యాబిన్ మధ్య 16.7 కిలోమీటర్ల దూరం విద్యుదీకరణతో పాటు సెక్షన్ సెప్టెంబర్, 2022లో పూర్తి చేసి ప్రారంభించబడింది.
ఇప్పుడు ఎర్రుపాలెం-చెరువుమాధవరం మధ్య 16.6 కిలోమీటర్ల మేర మూడో లైను విద్యుదీకరణతో పాటు ప్రారంభమైంది. ఈ 16.6 కి.మీల విస్తీర్ణంలో 5.5 కి.మీలు తెలంగాణ రాష్ట్ర పరిధిలోకి మరియు మిగిలినది ఆంధ్రప్రదేశ్ రాష్ట్ర పరిధిలో ఉన్నాయి. వీటిమధ్య విస్తరించి వున్నా మార్గంలో మూడో లైన్ను ప్రారంభించడం వల్ల సరుకు రవాణా మరియు ప్యాసింజర్ రైళ్లకు రద్దీ తగ్గుతుంది.
ఈ సందర్బంగా దక్షిణ మధ్య రైల్వే జనరల్ మేనేజర్ అరుణ్ కుమార్ జైన్ మాట్లాడుతూ .. చెరువుమాధవరం – ఎర్రుపాలెం మధ్య ట్రిపుల్ లైన్ పనులను విద్యుద్దీకరణతో పాటు విజయవంతంగా ప్రారంభించినందుకు విజయవాడ డివిజన్ మరియు నిర్మాణ సంస్థ యొక్క మొత్తం సిబ్బందిని అయన అభినందించారు. కాజీపేట-విజయవాడ ట్రిప్లింగ్ ప్రాజెక్ట్ను పూర్తి చేయడం వల్ల ఈ అధిక రాకపోకలు సాగించే ఈ మార్గంలో రద్దీ తగ్గడంతో పాటు అధిక సంఖ్యలో రైళ్లను సమర్థవంతంగా నిర్వహించడం సులభతరం అవుతుందని ఆయన అభిప్రాయపడ్డారు. ప్రస్తుత ఆర్థిక సంవత్సరంలో మౌలిక సదుపాయాల పనుల పురోగతి వేగంగా మరియు సంతృప్తికరమైన స్థాయికి చేరుకుందని ఆయన పేర్కొన్నారు.
