వచ్చే లోక్‌సభ ఎన్నికల్లో భాజపాను ఎదుర్కొనేందుకు కలిసి పోటీ చేసే విషయమై విపక్ష పార్టీలు తీవ్ర కసరత్తు చేస్తున్నాయి. ఇందులో భాగంగా ఉత్తర్‌ప్రదేశ్‌లో కాంగ్రెస్‌-సమాజ్‌వాదీ పార్టీ మధ్య సీట్ల సర్దుబాటుపై ఇప్పటికే ఒప్పందం కుదిరింది. ఈ క్రమంలోనే రాహుల్ గాంధీ భారత్‌ జోడో న్యాయ్‌ యాత్రలో ఎస్పీ అధినేత అఖిలేశ్‌ యాదవ్‌ పాల్గొన్నారు. యూపీలోని ఆగ్రాకు యాత్ర చేరుకున్న సమయంలో అఖిలేశ్‌ పాల్గొని మద్దతు ప్రకటించారు. ఆ సమయంలో వేదికపై ప్రియాంకా గాంధీ వాద్రా కూడా ఉన్నారు.
భారత్‌ జోడో న్యాయ్‌ యాత్ర మొదలైన అనంతరం విపక్ష పార్టీలకు చెందిన ఓ కీలక నేత ఇందులో పాల్గొనడం ఇదే మొదటిసారి. అంతకుముందు పశ్చిమ బెంగాల్‌లో యాత్ర కొనసాగుతున్న సమయంలో ఆ రాష్ట్ర ముఖ్యమంత్రి మమతా బెనర్జీ పాల్గొనే అవకాశాలున్నాయని వార్తలు వచ్చినప్పటికీ ఆమె మాత్రం ఇందుకు దూరంగా ఉన్నారు. యూపీలో కాంగ్రెస్‌-ఎస్పీ మధ్య సీట్ల సర్దుబాటు కుదిరిన కొన్ని రోజులకే అఖిలేశ్‌ ఇందులో పాల్గొనడం గమనార్హం. రాష్ట్రంలో కాంగ్రెస్‌ 17 లోక్‌సభ స్థానాల్లో పోటీ చేసేందుకు అంగీకరించగా.. ఎస్పీ 63 చోట్ల పోటీ చేయనుంది..
