మార్చి 16న ఏం జరగబోతుంది అరెస్టులు ఖాయం అంటున్న అమిత్ “షా”

ఈడీ అడ్వకేట్‌ రాజీనామా వెనుక ఆంతర్యమేమిటి?
అరెస్ట్‌లు ఖాయమంటున్న అమిత్‌షా
ఢిల్లీ మద్యం కుంభకోణం కేసులో ఊహించని పరిణామాలు జరుగుతున్నాయి. ఎవరి ఊహకూ అందని విధంగా.. ఎమ్మెల్సీ కల్వకుంట్ల కవిత విచారణ సమయంలోనే ఈడీ (ED) తరఫున కేసులు వాదించే అడ్వకేట్‌ నితీశ్‌ రానా తప్పుకోవడం చర్చనీయాశంగా మారింది. ఈడీ కేసులను వాదించే పబ్లిక్‌ ప్రాసిక్యూటర్‌ నితీశ్‌ రానా అకస్మాత్తుగా వైదొలగడంతో ఈ కేసులను వాదించడంలో ఏమైనా ఇబ్బందులు తలెత్తే అవకాశం ఉందా? అన్న చర్చ కూడా జరుగుతున్నది.

ఎమ్మెల్సీ కల్వకుంట్ల కవితను ఈడీ విచారించిన తరువాతనే నితీశ్‌ రానా తప్పుకోవడంలో ఆంతర్యం ఏమిటన్న చర్చ జరుగుతోంది. దీనితోపాటే ఈ నెల 16 వ తేదీ విచారణ తరువాత కవితను అరెస్ట్‌ చేస్తారా? లేదా? వదిలేస్తారా? ఏమి జరుగనున్నదనే చర్చ రాజకీయవర్గాల్లో జరుగుతున్నది.

ఢిల్లీలో హడావుడి
ఢిల్లీ మద్యం పాలసీ కేసులో ఎమ్మెల్సీ కవిత ఈ నెల 11వ తేదీన మొదటి సారిగా విచారణకు హాజరయ్యారు. ఈడీ విచారణ సమయంలో ఏమి జరుగుతుందోనన్న ఆత్రుతతో సీఎం కేసీఆర్‌ ఆదేశాల మేరకు కేటీఆర్‌ హరీశ్‌రావు సహా పలువురు మంత్రులు, కీలక నేతలు హుటాహుటిన ఢిల్లీకి వెళ్లారు. కేసు విచారణ సందర్భంగా అరెస్ట్‌ జరిగే అవకాశాలు లేకుండా చూసే క్రమంలో న్యాయ నిపుణులతో కూడా చర్చించారని వార్తలు వచ్చాయి.

మొత్తానికి ఎలాంటి అరెస్టు లేకుండా.. సుదీర్ఘ విచారణ అనంతరం కవితను అదే రోజు రాత్రి వదిలేశారు. అయితే.. మరోసారి ఈ నెల 16న విచారణకు హాజరు కావాలని సూచించింది. ఇదిలా ఉంటే.. కవిత విచారణ తర్వాత ఈడీ అడ్వకేట్‌ నితీశ్‌రానా రాజీనామా ఇప్పుడు కొత్త రాజకీయ చర్చకు దారి తీస్తున్నది. దీని వెనకాల ఏదో మతలబు జరిగిందన్న అనుమానాలు వ్యక్తమవుతున్నాయి. కవిత విచారణకు ముందు రోజే.. అంటే 15 తేదీన విచారణకు రావాలని బుచ్చిబాబుకు నోటీసులు ఇవ్వడం గమనార్హం.

ఈ నెల 16 వ తేదీన జరిగే విచారణను ఏ విధంగా ఎదుర్కోవాలన్న దానిపై సీఎం కేసీఆర్‌ సుదీర్ఘంగా చర్చలు జరిపారని సమాచారం. ముఖ్యంగా విచారణకు వెళ్లకుండా కొంత సమయం తీసుకోవడానికి ఉన్న మార్గాలపైనా సమాలోచనలు చేశారని తెలుస్తున్నది.

అసలు లిక్కర్‌ స్కాంలో ఈడీ వద్ద ఉన్న ఆధారాలేంటి? నోటీసులు జారీ చేయడానికి ఆధారాలు ఏంటి? తొలి రోజు విచారణలో అడిగిన ప్రశ్నలు, వాటికి కవిత ఇచ్చిన జవాబులు, అదే సమయంలో రామచంద్ర పిళ్లై, ఆడిటర్‌ బుచ్చిబాబు ఇచ్చిన స్టేట్‌మెంట్లు తదితరాలపై సీఎం చర్చలు జరిపారని తెలుస్తున్నది.