తెలుగు రాష్ట్రాల నుంచి 10 వేల మంది యాత్రికులు

హైదరాబాద్ :
ముస్లింలు అత్యంత పవిత్రంగా భావించే హజ్‌ యాత్ర తెల్లవారు జాము నుండే మక్కా పుణ్యక్షేత్రంలో ప్రారంభమైంది. ఐదు రోజుల పాటు జరిగే ఈ ఆధ్యాత్మిక కార్యక్రమంలో తెలుగు రాష్ట్రాల నుంచి 10 వేల మంది పాల్గొంటుండగా, సుమారు మరో 2 వేల మంది ఇతర దేశాల్లో నివసిస్తున్న తెలుగు రాష్ట్రాల ప్రవాసీయులు పాల్గొంటున్నారు. భారత దేశం నుంచి ఈసారి అత్యధికంగా 1.75 లక్షల మందితో పాటు ప్రపంచ వ్యాప్తంగా 25 లక్షల మందికి పైగా యాత్రికులు తరలి వచ్చారు. భారతీయ యాత్రికులంతా సోమవారం తెల్లవారు జామున ప్రార్ధనల అనంతరం అహెరాం అనే తెల్లటి సాదా బట్టలను కప్పుకుని మక్కా నగర శివారులోని మీనా అనే ప్రాంతానికి వెళ్లారు.

అక్కడ ఐదు రోజుల పాటు గుడారాల్లో బస చేస్తూ హజ్‌ నియమాలను పూర్తి చేస్తారు. తెలుగు రాష్ట్రాలకు చెందిన యాత్రికులంతా హైదరాబాద్‌, విజయవాడ, బెంగళూరు విమానాశ్రయాల ద్వారా ప్రత్యేక విమానాల్లో సౌదీ అరేబియాకు చేరుకున్నారు. తన జీవితకాల స్వప్నమైన హజ్‌ యాత్రకు రావడం అమిత ఆనందాన్ని కలిగిస్తోందని హైదరాబాద్‌లోని మెహిదీపట్నంకు చెందిన మహ్మద్‌ యాకుబ్‌ వ్యాఖ్యానించారు. హజ్‌ యాత్ర ప్రారంభమైన సోమవారం మధ్యాహ్నానికి మీనా లోయలో ఉష్ణోగ్రత 46 డిగ్రీలకు చేరుకుంది. గల్ఫ్‌లో ఇది సాధారణ ఉష్ణోగ్రతే కానీ, భారత్‌ నుంచి వచ్చిన యాత్రికులు వేడిని తట్టుకోలేక అస్వస్థతతో ఇప్పటి వరకు 49 మంది మరణించగా, అనేకమంది అనారోగ్యానికి గురవుతున్నారు. మృతుల్లో మహబూబ్‌నగర్‌కు చెందిన ఓ యాత్రికుడు ఉన్నాడు. ఇలాంటి పరిస్థితుల్లో భారత్‌ నుంచి వచ్చిన 300 మందికి పైగా వైద్య బృందం రోగులకు సేవలు అందిస్తోంది. భారతీయ రాయబారి సోహెల్‌ ఏజాస్‌ఖాన్‌ నేతృత్వంలోని భారతీయ అధికారుల బృందం యాత్రికుల రవాణా, ఇతర ఏర్పాట్లను పర్యవేక్షిస్తోంది…