ఇంటింటా త్రివర్ణ పతాక స్ఫూర్తి…రామగుండం ఎన్టీపీసీ లో ‘హర్ ఘర్ తిరంగా’ ప్రదర్శన….
సాక్షిత పెద్దపల్లి-జిల్లా ప్రతినిధి, రామగుండం ఎన్టీపీసీ/ : స్వాతంత్ర్య దినోత్సవ వేడుకల్లో భాగంగా దేశభక్తి, జాతీయ ఐక్యతను చాటేలా ఎన్టీపీసీ రామగుండం ఆధ్వర్యంలో ‘హర్ ఘర్ తిరంగా’ ప్రత్యేక ప్రదర్శనను నిర్వహిస్తున్నారు. ఆగస్టు 13 నుంచి 20వ తేదీ వరకు కొనసాగనున్న ఈ ప్రదర్శనలో జాతీయ పతాకం గొప్పతనం, భారత స్వాతంత్ర్య పోరాటం, దేశ జాతీయ గుర్తింపు ప్రస్థానాన్ని ప్రతిబింబించే వివిధ ప్రదర్శనలను ఏర్పాటు చేశారు.
ఈ ప్రదర్శనను ఎన్టీపీసీ రామగుండం, తెలంగాణ ఎగ్జిక్యూటివ్ డైరెక్టర్ చందన్ కుమార్ సమంత ముఖ్య అతిథిగా హాజరై ప్రారంభించారు. దీప్తి మహిళా సమితి (డీఎంఎస్) అధ్యక్షురాలు రాఖీ సమంతతో పాటు ఎన్టీపీసీ అధికారులు, ఉద్యోగులు, కుటుంబ సభ్యులు ఈ కార్యక్రమంలో పాల్గొన్నారు.
ఈ సందర్భంగా ఏర్పాటు చేసిన ప్రదర్శనలో త్రివర్ణ పతాకం ప్రాముఖ్యత, దాని చారిత్రక నేపథ్యం, భారత స్వాతంత్ర్య పోరాటం, జాతీయ ఐక్యతకు సంబంధించిన అంశాలను ఆకట్టుకునేలా ప్రదర్శిస్తున్నారు. ఎన్టీపీసీ టౌన్షిప్లోని ఉద్యోగులు, వారి కుటుంబ సభ్యులు, స్థానిక నివాసితులు ప్రదర్శనను సందర్శించి ‘హర్ ఘర్ తిరంగా’ వేడుకల్లో భాగస్వాములు కావాలని నిర్వాహకులు సూచించారు.
దేశభక్తి భావనను పెంపొందించడంతో పాటు జాతీయ జెండాపై గౌరవం, ఐక్యత, జాతీయ గర్వాన్ని ప్రతి ఒక్కరిలో మరింత బలోపేతం చేయడమే ఈ కార్యక్రమం ముఖ్య ఉద్దేశమని ఎన్టీపీసీ రామగుండం ప్రతినిధులు తెలిపారు. ఎన్టీపీసీ కుటుంబంతో పాటు పరిసర సమాజంలోనూ ‘హర్ ఘర్ తిరంగా’ స్ఫూర్తిని విస్తరించేందుకు ఈ కార్యక్రమం దోహదపడుతుందని పేర్కొన్నారు.
