ప్రశాంత్ నగర్ చెరువు పునరుద్ధరణకు శ్రీకారం – నగర అభివృద్ధికి కొత్త ఊపు

ప్రశాంత్ నగర్ చెరువు పునరుద్ధరణకు శ్రీకారం – నగర అభివృద్ధికి కొత్త ఊపు….

సాక్షిత పెద్దపల్లి// గోదావరిఖని: . రామగుండం నగర అభివృద్ధి దిశగా కీలక అడుగు పడింది. నగర పాలక సంస్థ పరిధిలోని ప్రశాంత్ నగర్ చెరువు పునరుద్ధరణ పనులకు ఎమ్మెల్యే ఎం.ఎస్. రాజ్ ఠాకూర్ ఘనంగా శంకుస్థాపన చేశారు. సుమారు ₹253 లక్షల వ్యయంతో చేపట్టనున్న ఈ పనులు ప్రాంత ప్రజలకు దీర్ఘకాల ప్రయోజనాలను అందించనున్నాయి.

ఈ సందర్భంగా ఎమ్మెల్యే మాట్లాడుతూ చెరువులు కేవలం నీటి నిల్వ కేంద్రాలు మాత్రమే కాకుండా పర్యావరణ సమతౌల్యానికి కీలకమైనవని తెలిపారు. చెరువుల పునరుద్ధరణ ద్వారా భూగర్భ జలాల స్థాయి పెరిగి తాగునీటి సమస్యకు కొంతవరకు పరిష్కారం లభిస్తుందని చెప్పారు. వర్షపు నీటిని నిల్వ చేసి భవిష్యత్తు తరాలకు నీటి వనరులను సంరక్షించడం అత్యంత అవసరమని పేర్కొన్నారు.

చెరువు శుద్ధి, గట్టుల బలపరచడం, నీటి నిల్వ సామర్థ్యం పెంపు, పరిసర ప్రాంతాల సుందరీకరణ వంటి పనులు చేపట్టనున్నట్లు తెలిపారు. ఈ పనులు పూర్తయ్యాక చెరువు ప్రాంతం ప్రజలకు ఆహ్లాదకర వాతావరణాన్ని అందించడమే కాకుండా పర్యావరణ పరిరక్షణకు ఆదర్శంగా నిలుస్తుందని ఎమ్మెల్యే ఆశాభావం వ్యక్తం చేశారు.
నగరాభివృద్ధికి ప్రభుత్వం కట్టుబడి ఉందని, ప్రజల అవసరాలకు అనుగుణంగా మౌలిక వసతులను మెరుగుపరచడం తమ లక్ష్యమని స్పష్టం చేశారు.

ఈ కార్యక్రమంలో మేయర్, డిప్యూటీ మేయర్, కార్పోరేటర్లు, ప్రజాప్రతినిధులు, అధికారులు, నాయకులు, ప్రజలు పెద్ద సంఖ్యలో పాల్గొన్నారు.