గొట్టిపర్తిలో ధాన్యం కొనుగోళ్లలో అక్రమాలు – క్వింటాకు 5 కిలోల కటింగ్పై రైతుల ఆగ్రహం, బస్తాలకు నిప్పు
సాక్షిత సూర్యాపేట జిల్లా ప్రతినిధి: సూర్యాపేట జిల్లా గొట్టిపర్తి గ్రామంలో ఐకేపీ ధాన్యం కొనుగోలు వ్యవహారంలో తీవ్రమైన అక్రమాలు జరుగుతున్నాయనే ఆరోపణలు వెలుగులోకి వచ్చాయి. రైతులు కొనుగోలు కేంద్రాలకు తీసుకువచ్చిన ఒడ్లను క్వింటాలుగా కొలిచి మిల్లులకు తరలించిన తర్వాత, ప్రతి క్వింటాకు సుమారు 5 కిలోల వరకు ధాన్యం కటింగ్ చేస్తున్నట్లు సమాచారం. స్థానికంగా ఒక ప్రభావశాలి వ్యక్తి ఒడ్లు పట్టకుండా నేరుగా క్వింటాలుగా నమోదు చేసి మిల్లులకు పంపించి, ప్రతి క్వింటాకు 5 కిలోల చొప్పున కటింగ్ తీసుకున్నట్లు ఆరోపణలు వినిపిస్తున్నాయి. ఇదే విధానాన్ని అనుసరించిన రైస్ మిల్లర్లు, రైతులు పంపించిన ధాన్యంపైనా అదే రీతిలో కటింగ్ విధిస్తున్నారని రైతులు చెబుతున్నారు.
ఈ చర్యల వల్ల సాధారణ రైతులు తీవ్ర నష్టాలను ఎదుర్కొంటున్నారు. ఒక్క క్వింటాకు 5 కిలోల కోత విధించడం ద్వారా రైతుల ఆదాయం గణనీయంగా తగ్గిపోతుందని వారు ఆవేదన వ్యక్తం చేస్తున్నారు. ఈ అక్రమాలపై ఆగ్రహం వ్యక్తం చేసిన రైతులు నిరసనకు దిగారు. తమ ధాన్యం బస్తాలకు నిప్పు పెట్టి నిరసన వ్యక్తం చేయడంతో గ్రామంలో ఉద్రిక్త పరిస్థితులు నెలకొన్నాయి. ఈ ఘటన జిల్లా వ్యాప్తంగా చర్చనీయాంశంగా మారింది. సంబంధిత అధికారులు వెంటనే స్పందించి పూర్తి స్థాయి విచారణ జరిపి బాధ్యులపై కఠిన చర్యలు తీసుకోవాలని రైతులు డిమాండ్ చేస్తున్నారు. అలాగే భవిష్యత్తులో ఇటువంటి ఘటనలు పునరావృతం కాకుండా కట్టుదిట్టమైన చర్యలు చేపట్టాలని కోరుతున్నారు.
