సోలిపేటలో ఎండిన మొక్కలు చెత్తతో నిండిన పల్లె ప్రకృతి వనం

సోలిపేటలో ఎండిన మొక్కలు చెత్తతో నిండిన పల్లె ప్రకృతి వనం

సాక్షిత సూర్యాపేట జిల్లా ప్రతినిధి

తెలంగాణ ప్రభుత్వం పచ్చదనం పెంపొందించాలనే లక్ష్యంతో తెలంగాణ హరితహారం కార్యక్రమంలో భాగంగా ప్రవేశపెట్టిన పల్లె ప్రకృతి వనం పథకం, గ్రామాల్లో పర్యావరణ సమతుల్యతను కాపాడుతూ ప్రజలకు స్వచ్ఛమైన వాతావరణాన్ని అందించాలనే గొప్ప ఉద్దేశంతో అమలు చేయబడింది.

అయితే సూర్యాపేట మండలం సోలిపేట గ్రామంలో ఈ పథకం పూర్తిగా నిర్లక్ష్యానికి గురై, అసలు ఉద్దేశాన్ని కోల్పోతున్న దృశ్యాలు కనిపిస్తున్నాయి. గ్రామంలో ఏర్పాటు చేసిన పల్లె ప్రకృతి వనంలో నాటిన మొక్కలు నీరు లేక ఎండిపోతున్నాయి. చెట్ల మొదళ్ల వద్ద మట్టి పూర్తిగా ఎండిపోయి పగుళ్లు పడిన పరిస్థితి కనిపిస్తోంది. కొంతకాలంగా నీటి జాడే లేకపోవడంతో మొక్కలు క్రమంగా జీవం కోల్పోతూ, ఆకులు వాడిపడి నేలకే పరిమితమవుతున్నాయి.

పచ్చదనం నిండాల్సిన ప్రదేశం ఇప్పుడు ఎండిన ఆకులు, నిర్జీవమైన మొక్కలతో వెలవెలబోతుంది. ఇంకా ఆందోళన కలిగించే విషయం ఏమిటంటే, వనం అంతటా చెత్తాచెదారం పేరుకుపోయి ఉంది. ప్లాస్టిక్ కవర్లు, వ్యర్థ పదార్థాలు ఎక్కడికక్కడ పేరుకుపోయి, అక్కడ నడవడానికి కూడా వీలు లేకుండా మారింది. మొక్కల మధ్య దారులు కనిపించకుండా ముల్లు మొక్కలు, గడ్డి పెరిగిపోయి పూర్తిగా నిర్లక్ష్యాన్ని ప్రతిబింబిస్తున్నాయి. పర్యావరణ పరిరక్షణకు నిలువెత్తు నిదర్శనంగా ఉండాల్సిన వనం, ఇప్పుడు చెత్తకుప్పలా మారడం గ్రామస్తులను కలచివేస్తోంది. ఈ పరిస్థితిపై గ్రామ ప్రజలు తీవ్ర ఆగ్రహం వ్యక్తం చేస్తున్నారు.

“సర్పంచ్, ఉప సర్పంచ్, వార్డు సభ్యులు, గ్రామ కార్యదర్శి ఉన్నా… కనీసం మొక్కలకు నీరు పోయించే పరిస్థితి కూడా లేకపోవడం ఎందుకు?” అంటూ ప్రశ్నిస్తున్నారు. ప్రభుత్వ నిధులతో ఏర్పాటైన పథకాన్ని ఈ స్థాయిలో నిర్లక్ష్యం చేయడం బాధాకరమని అంటున్నారు. పల్లె ప్రకృతి వనాలు గ్రామాల్లో పచ్చదనం పెంచడమే కాకుండా ప్రజలకు విశ్రాంతి, ఆరోగ్యకర వాతావరణం కల్పించాలనే లక్ష్యంతో ఏర్పాటు చేయబడినవి. కానీ సరైన పర్యవేక్షణ లేకపోతే అవి ఎలా నిరుపయోగంగా మారిపోతాయో సోలిపేట గ్రామం ఉదాహరణగా నిలుస్తోంది.

ఇప్పటికైనా సంబంధిత అధికారులు స్పందించి వనంలో శుభ్రత పనులు చేపట్టి, తక్షణమే నీటి సౌకర్యం కల్పించి మొక్కలను రక్షించాలని గ్రామస్తులు కోరుతున్నారు. నిర్లక్ష్యంగా వ్యవహరించిన వారిపై చర్యలు తీసుకోవాలని డిమాండ్ చేస్తున్నారు. పచ్చదనం కాపాడాలనే సంకల్పంతో ప్రారంభమైన పథకం, నిర్లక్ష్యంతో నశించకుండా కాపాడటానికి అధికారులు వెంటనే స్పందించాలని గ్రామస్తులు కోరుతున్నారు.