హెల్మెట్ ఒక వస్తువు కాదు, ప్రాణాన్ని కాపాడే రక్షణ ఆయుధం…..

హెల్మెట్ ఒక వస్తువు కాదు, ప్రాణాన్ని కాపాడే రక్షణ ఆయుధం…..

-డీసీపీ బి.రామ్ రెడ్డి….

సాక్షిత పెద్దపల్లి //సుల్తానాబాద్ అరైవ్-అలైవ్ రెండో విడత కార్యక్రమంలో భాగంగా సుల్తానాబాద్ పట్టణంలో హెల్మెట్, సీట్ బెల్ట్ ఉపయోగాలపై అవగాహన కల్పించారు.

అనంతరం హెల్మెట్, సీట్ బెల్ట్ ధరించిన వాహనదారులకు పెద్దపల్లి డీసీపీ బి.రామ్ రెడ్డి,ఏసీపీ జి.కృష్ణ కలిసి గులాబీ పువ్వులు అందించి అభినందించారు.

ఈ సందర్భంగా డీసీపీ మాట్లాడుతూ… ప్రతి మోటార్ సైకిల్ వాహనదారుడు తప్పనిసరిగా హెల్మెట్ ధరించాలని సూచించారు.హెల్మెట్ ధరించని వారిపై తరచుగా ప్రత్యేక డ్రైవ్‌లు నిర్వహించి కేసులు నమోదు చేస్తామని తెలిపారు. రోడ్డు ప్రమాదాల్లో హెల్మెట్ ధరించకపోవడం వల్ల అనేక మంది ద్విచక్ర వాహనదారులు ప్రాణాలు కోల్పోతున్నారని అన్నారు.

ప్రతి వాహనదారుడు వాహనానికి సంబంధించిన పత్రాలను వెంట ఉంచుకోవాలని, త్రిబుల్ రైడింగ్, నిర్లక్ష్యంగా డ్రైవింగ్ చేయవద్దని సూచించారు. హెల్మెట్‌ను బరువుగా కాకుండా బాధ్యతగా భావించాలని చెప్పారు.

హెల్మెట్ మా శాసనం కాదు, మీ సంక్షేమం కోసం అని తెలిపారు. హెల్మెట్ ఒక వస్తువు కాదు, ప్రాణాన్ని కాపాడే రక్షణ ఆయుధమని పేర్కొన్నారు.

రోడ్ చిన్నదైనా పెద్దదైనా ప్రమాదం ఎప్పుడైనా,ఎక్కడైనా సంభవించవచ్చని, అందువల్ల ద్విచక్ర వాహనాలు నడిపే ప్రతి ఒక్కరూ తప్పనిసరిగా హెల్మెట్ ధరించాలని సూచించారు.

ఈ కార్యక్రమంలో పెద్దపల్లి ఏసీపీ జి. కృష్ణ, సుల్తానాబాద్ సీఐ సుబ్బారెడ్డి, ఎస్‌ఈ చంద్ర కుమార్, సిబ్బంది పాల్గొన్నారు.