రామగుండం ఎన్టీపీసీ ఆధ్వర్యంలో గ్రామీణ యువతకు, పోటీ పరీక్షల కోచింగ్ కార్యక్రమం ప్రారంభం….
సాక్షిత పెద్దపల్లి// జిల్లా ప్రతినిథి: ఎన్టీపీసీ, నైపుణ్యాభివృద్ధి, యువత సాధికారత పట్ల తన నిబద్ధతలో భాగంగా ఎన్టీపీసీ రామగుండం, దీప్తి మహిళా సమితి (డీఎంఎస్) సహకారంతో గ్రామీణ నిరుద్యోగ యువత కోసం ఆరు నెలల పోటీ పరీక్షల కోచింగ్ కార్యక్రమాన్ని ప్రారంభించింది. వివిధ పోటీ పరీక్షలకు హాజరయ్యే ఆశావహ అభ్యర్థులకు నాణ్యమైన శిక్షణ అందించేందుకు ఈ కార్యక్రమాన్ని ప్రారంభించారు.
ప్రస్తుతం అనేక మంది అభ్యర్థులు కోచింగ్ కోసం హైదరాబాద్తో పాటు ఇతర నగరాలకు వెళ్లాల్సి వస్తోంది. దీంతో కోచింగ్ ఫీజులు, హాస్టల్ వసతి, స్టడీ హాల్స్, పాఠ్యసామగ్రి వంటి ఖర్చులు గణనీయంగా పెరుగుతున్నాయి. ఈ సమస్యలను గుర్తించిన ఎన్టీపీసీ, స్థానికంగానే నాణ్యమైన కోచింగ్ అందుబాటులోకి తీసుకురావాలని ఈ కార్యక్రమాన్ని చేపట్టింది. దీంతో విద్యార్థులు, వారి కుటుంబాలపై ఆర్థిక భారం తగ్గనుంది.
ఎన్టీపీసీ ప్రాంగణంలోని సాయి సేవా సమితి లైఫ్ స్కిల్ అకాడమీలో పోటీ పరీక్షల కోచింగ్ కార్యక్రమం ప్రారంభమైంది. ప్రభుత్వ ఉద్యోగాలు, ఇతర పోటీ పరీక్షలకు సిద్ధమవుతున్న అభ్యర్థులకు అవసరమైన జ్ఞానం, మార్గదర్శనం, వనరులు అందించడం ఈ కార్యక్రమం ప్రధాన లక్ష్యం. దీని ద్వారా వారి ఉద్యోగావకాశాలు, కెరీర్ అవకాశాలు మరింత మెరుగుపడనున్నాయి.
ఈ కార్యక్రమం ద్వారా ఎన్టీపీసీ రామగుండం చుట్టుపక్కల ప్రాంతాల సామాజిక-ఆర్థిక అభివృద్ధికి తన వంతు సహకారం అందిస్తూ, విద్య, నైపుణ్యాభివృద్ధి, కెరీర్ ఆధారిత మద్దతు ద్వారా యువతను సాధికారత దిశగా ముందుకు నడిపిస్తోంది.
