వైద్య ప్రవేశ పరీక్ష ప్రశ్నపత్రాల లీకేజీకి బాధ్యత వహించి కేంద్ర విద్యాశాఖ మంత్రి రాజీనామా చేయాలి

వైద్య ప్రవేశ పరీక్ష ప్రశ్నపత్రాల లీకేజీకి బాధ్యత వహించి కేంద్ర విద్యాశాఖ మంత్రి రాజీనామా చేయాలి….

— విద్యార్థి, యువజన సంఘాల డిమాండ్…

సాక్షిత పెద్దపల్లి//జిల్లా ప్రతినిధి: గోదావరిఖని, వైద్య ప్రవేశ పరీక్ష ప్రశ్నపత్రాల లీకేజీకి నైతిక బాధ్యత వహిస్తూ కేంద్ర విద్యాశాఖ మంత్రి ధర్మేంద్ర ప్రధాన్ వెంటనే రాజీనామా చేయాలని విద్యార్థి, యువజన సంఘాల నాయకులు డిమాండ్ చేశారు. అలాగే ఢిల్లీలో శాంతియుతంగా నిరసన వ్యక్తం చేస్తున్న విద్యార్థులపై లాఠీచార్జ్ చేసిన పోలీసులపై కఠిన చర్యలు తీసుకోవాలని కోరారు.

రాష్ట్రవ్యాప్తంగా నిర్వహించిన విద్యాసంస్థల బంద్‌లో భాగంగా గోదావరిఖని పారిశ్రామిక ప్రాంతంలో బంద్ విజయవంతమైందని అఖిల భారత విద్యార్థి సమాఖ్య జిల్లా కార్యదర్శి రేణుకుంట్ల ప్రీతం, జాతీయ విద్యార్థి సంఘం రాష్ట్ర కార్యదర్శి బైరిమల దుర్గాప్రసాద్, ప్రజాతంత్ర యువజన సమాఖ్య నాయకుడు కొంటు సాగర్ తెలిపారు.

ఈ సందర్భంగా వారు మాట్లాడుతూ, భారతీయ జనతా పార్టీ అధికారంలోకి వచ్చిన తర్వాత వైద్య ప్రవేశ పరీక్షలతో పాటు కేంద్ర ప్రభుత్వం నిర్వహించే అనేక పోటీ పరీక్షల ప్రశ్నపత్రాల లీకేజీలు తరచూ జరుగుతున్నాయని, దీనివల్ల విద్యార్థుల భవిష్యత్తు అనిశ్చితిలో పడుతోందని విమర్శించారు.

ప్రశ్నపత్రాల లీకేజీపై దేశవ్యాప్తంగా విద్యార్థులు కేంద్ర విద్యాశాఖ మంత్రి రాజీనామా చేయాలని డిమాండ్ చేస్తున్నప్పటికీ, ఇప్పటివరకు ప్రధానమంత్రి స్పందించకపోవడం విచారకరమన్నారు. ఢిల్లీలో శాంతియుతంగా నిరసన తెలుపుతున్న విద్యార్థులపై పోలీసులు లాఠీచార్జ్ చేయడాన్ని తీవ్రంగా ఖండించారు.

ప్రస్తుతం పార్లమెంట్ సమావేశాలు జరుగుతున్నప్పటికీ, ఈ అంశంపై తెలంగాణకు చెందిన భారతీయ జనతా పార్టీ ఎంపీలు స్పందించకపోవడం గమనార్హమని పేర్కొన్నారు. ప్రశ్నపత్రాల లీకేజీ ఘటనల కారణంగా ప్రాణాలు కోల్పోయిన విద్యార్థుల కుటుంబాలకు కోటి రూపాయల నష్టపరిహారం ప్రకటించాలని డిమాండ్ చేశారు.
జాతీయ పరీక్షల నిర్వహణ సంస్థను రద్దు చేసి, వైద్య ప్రవేశ పరీక్ష నిర్వహణ బాధ్యతలను రాష్ట్రాలకు అప్పగించాలని, సంబంధిత చట్టాన్ని కూడా రద్దు చేయాలని కేంద్ర ప్రభుత్వాన్ని కోరారు. తమ డిమాండ్లు నెరవేర్చకపోతే దేశవ్యాప్తంగా విద్యార్థి ఉద్యమాన్ని మరింత ఉధృతం చేస్తామని హెచ్చరించారు.

ఈ కార్యక్రమంలో అఖిల భారత విద్యార్థి సమాఖ్య జిల్లా అధ్యక్షుడు ఆర్నకొండ సాయి ఆజాద్, తడిగొప్పుల అనుప్ సాయి, అభి, గోడిసెల ప్రణీత్, ప్రజాతంత్ర యువజన సమాఖ్య నాయకులు ముగిలిచల్ల సురేష్, వీరసూర్య, సత్య, విష్ణు, జీవన్ తదితరులు పాల్గొన్నారు