పుట్టా మధూ.. నోరు అదుపులో పెట్టుకో…

పుట్టా మధూ.. నోరు అదుపులో పెట్టుకో…

శ్రీధర్‌బాబును విమర్శించే అర్హత మధుకు లేదు.. అభివృద్ధిని చూసి ఓర్వలేకే విమర్శలు…

— తొట్ల తిరుపతి యాదవ్….

సాక్షిత పెద్దపల్లి- జిల్లా ప్రతినిధి, రామగిరి/ రాష్ట్ర మంత్రి, మంథని ఎమ్మెల్యే దుద్దిళ్ల శ్రీధర్‌బాబుపై మాజీ ఎమ్మెల్యే పుట్ట మధు చేసిన వ్యాఖ్యలను ఖండిస్తూ కాంగ్రెస్ శ్రేణులు తీవ్రంగా మండిపడ్డాయి. మంథని బ్లాక్ కాంగ్రెస్ అధ్యక్షులు తొట్ల తిరుపతి యాదవ్ మాట్లాడుతూ పుట్ట మధు తన నోటి దురుసు మాటలను ఇకనైనా అదుపులో పెట్టుకోవాలని హెచ్చరించారు.

రామగిరి మండలం బేగంపేట ఎక్స్‌రోడ్‌లోని కాంగ్రెస్ పార్టీ కార్యాలయంలో మండల కాంగ్రెస్ అధ్యక్షులు రొడ్డ బాపన్న పటేల్ ఆధ్వర్యంలో నిర్వహించిన విలేకరుల సమావేశంలో తొట్ల తిరుపతి యాదవ్ మాట్లాడారు. శ్రీధర్‌బాబుపై అనుచిత వ్యాఖ్యలు చేయడం పుట్ట మధుకు తగదన్నారు. అయితే, రాజకీయ ప్రత్యర్థిపై విమర్శలకు ప్రతిగా వ్యక్తిగత దాడులు, హింసకు సంబంధించిన హెచ్చరికలు చేయడం సరికాదని పేర్కొంటూ, ప్రజాస్వామ్య పద్ధతిలో విమర్శలు–ప్రతివిమర్శలు ఉండాలని అన్నారు.

సీబీఐ విచారణతోనే ఫ్రస్ట్రేషన్‌లో వ్యాఖ్యలు: తిరుపతి యాదవ్ గట్టు వామన్‌రావు దంపతుల హత్య కేసుకు సంబంధించి సీబీఐ విచారణకు హాజరైన పుట్ట మధు రాజకీయ భవిష్యత్తుపై ఆందోళనతోనే ఫ్రస్ట్రేషన్‌లో మాట్లాడుతున్నారని తిరుపతి యాదవ్ ఆరోపించారు. అయితే కేసు దర్యాప్తుపై తుది నిర్ణయం దర్యాప్తు సంస్థల పరిధిలోనే ఉంటుందని, రాజకీయ ఆరోపణలతో వాస్తవాలను మార్చలేరన్నారు.

మంథని నియోజకవర్గానికి వందల కోట్ల రూపాయల నిధులతో అభివృద్ధి కార్యక్రమాలు చేపడుతూ, పరిశ్రమలు, పెట్టుబడులు తీసుకురావడంతో పాటు నిరుద్యోగులకు ఉపాధి అవకాశాల కల్పనకు మంత్రి శ్రీధర్‌బాబు కృషి చేస్తున్నారని తెలిపారు. ఈ అభివృద్ధిని చూసి ఓర్వలేకే పుట్ట మధు విమర్శలు చేస్తున్నారని ఆరోపించారు.

“మాఫియా చరిత్ర నీది.. అభివృద్ధి లక్ష్యం మాది”
గతంలో పుట్ట మధు అధికారంలో ఉన్న సమయంలో మంథని ప్రాంతంలో ఇసుక, మట్టి మాఫియాలు, హత్యలు, అలజడులు చోటుచేసుకున్నాయని కాంగ్రెస్ నేతలు ఆరోపించారు. ఈ ఆరోపణలకు ప్రజలే సరైన తీర్పు ఇస్తారని అన్నారు. శ్రీధర్‌బాబు పనితీరును ప్రజలు గుర్తిస్తున్నారని, కాంగ్రెస్ ప్రభుత్వం చేపడుతున్న అభివృద్ధి కార్యక్రమాలతో మంథని మరింత అభివృద్ధి చెందుతోందన్నారు.

40 ఏళ్లుగా మంథని ప్రజలు శ్రీపాదరావు, శ్రీధర్‌బాబు కుటుంబాన్ని ఎందుకు ఆదరిస్తున్నారో పుట్ట మధు ఆత్మవిమర్శ చేసుకోవాలని తిరుపతి యాదవ్ సూచించారు. మాజీ ఎమ్మెల్యే, మాజీ జెడ్పీ చైర్మన్‌గా ఉన్న గౌరవాన్ని కాపాడుకుంటూ బాధ్యతాయుతంగా మాట్లాడాలని హితవు పలికారు.

మంథని నియోజకవర్గ అభివృద్ధి, తెలంగాణ రాష్ట్ర ప్రగతి కోసం మంత్రి శ్రీధర్‌బాబు నాయకత్వంలో కాంగ్రెస్ శ్రేణులు ఐక్యంగా పనిచేస్తాయని తొట్ల తిరుపతి యాదవ్ స్పష్టం చేశారు.

ఈ సమావేశంలో పెద్దపల్లి జిల్లా కాంగ్రెస్ కమిటీ ఉపాధ్యక్షులు ఎల్లే రామ్మూర్తి, మాజీ ఎంపీపీ ఆరెల్లి దేవక్క కొమురయ్య గౌడ్, రామగిరి మండల బీసీ సెల్ అధ్యక్షులు బండారి సదానందం, ఎస్సీ సెల్ అధ్యక్షులు కండె పోషం, యూత్ అధ్యక్షులు మోత్కూరి అవినాష్ గౌడ్, సుందిళ్ల లక్ష్మీనరసింహస్వామి దేవస్థానం చైర్మన్ సత్యనారాయణ గౌడ్, వివిధ గ్రామాల సర్పంచులు, మాజీ సర్పంచులు, కాంగ్రెస్ నాయకులు, కార్యకర్తలు పాల్గొన్నారు.