గంజాయి, మత్తు పదార్థాలపై పోలీసుల ఉక్కుపాదం

గంజాయి, మత్తు పదార్థాలపై పోలీసుల ఉక్కుపాదం
రూ.17.09 లక్షల విలువైన 40.173 కిలోల గంజాయిని ధ్వంసం చేసిన రామగుండం పోలీసు కమిషనరేట్….

మత్తు పదార్థాల విక్రయం, రవాణాపై కఠిన చర్యలు తప్పవు : పోలీసు కమిషనర్ అంబర్ కిషోర్ ఝా….

సాక్షిత –పెద్దపల్లి/జిల్లా ప్రతినిధి,
గంజాయి, ఇతర మత్తు పదార్థాల నిర్మూలనకు రామగుండం పోలీసు కమిషనరేట్ కట్టుదిట్టమైన చర్యలు చేపడుతోందని పోలీసు కమిషనర్ అంబర్ కిషోర్ ఝా తెలిపారు. కమిషనరేట్ పరిధిలోని పెద్దపల్లి, మంచిర్యాల జిల్లాల వివిధ పోలీసు స్టేషన్లలో నమోదైన 81 మత్తు పదార్థాల నిరోధక చట్టం కేసుల్లో నిందితుల నుంచి స్వాధీనం చేసుకున్న 40.173 కిలోల ఎండు గంజాయితో పాటు 26 గంజాయి మొక్కలను న్యాయస్థానం అనుమతితో ధ్వంసం చేసినట్లు వెల్లడించారు.

న్యాయాధికారుల సమక్షంలో న్యాయ పరీక్షల కోసం నమూనాలు సేకరించిన అనంతరం, కమిషనరేట్ మత్తు పదార్థాల నిర్మూలన కమిటీ ఆధ్వర్యంలో పర్యావరణ పరిరక్షణ నిబంధనలు పాటిస్తూ కరీంనగర్ జిల్లా మానకొండూర్ మండలం ఈదులగట్టెపల్లి గ్రామంలోని ప్రత్యేక దహన కేంద్రంలో గంజాయిని దహనం చేసినట్లు తెలిపారు. ధ్వంసం చేసిన గంజాయి, గంజాయి మొక్కల మొత్తం విలువ సుమారు రూ.17.09 లక్షలు ఉంటుందని పేర్కొన్నారు.

ఈ సందర్భంగా పోలీసు కమిషనర్ మాట్లాడుతూ, గంజాయి, మత్తు పదార్థాల అక్రమ సాగు, రవాణా, నిల్వ, సరఫరా, విక్రయాల ద్వారా యువతను మత్తుకు బానిసలుగా మారుస్తున్న వారిపై ప్రత్యేక నిఘా ఉంచామని తెలిపారు. స్థానిక పోలీసులు, ప్రత్యేక మత్తు పదార్థాల నియంత్రణ బృందాలు, మాదక ద్రవ్యాల నిరోధక విభాగం సంయుక్తంగా విస్తృత స్థాయిలో తనిఖీలు నిర్వహిస్తున్నట్లు చెప్పారు.

ఎవరైనా గంజాయి లేదా ఇతర మత్తు పదార్థాలను విక్రయించినా, రవాణా చేసినా, నిల్వ ఉంచినా చట్టప్రకారం కఠిన చర్యలు తీసుకుంటామని హెచ్చరించారు. గంజాయి విక్రయించే లేదా వినియోగించే వారి వివరాలను పోలీసులకు అందించిన వారి వివరాలు పూర్తిగా గోప్యంగా ఉంచుతామని తెలిపారు. మత్తు పదార్థాలను వినియోగించే వారిపైనా చట్టపరమైన కేసులు నమోదు చేయడంతో పాటు అవసరమైతే నిర్బంధ చట్టం కింద చర్యలు తీసుకుంటామని స్పష్టం చేశారు.
ఈ కార్యక్రమంలో పెద్దపల్లి డీసీపీ బి. రామ్‌రెడ్డి, అదనపు డీసీపీ (పరిపాలన) కె. శ్రీనివాస్, గోదావరిఖని ఏసీపీ ఎం. రమేష్, జైపూర్ ఏసీపీ ఎ. వెంకటేశ్వర్లు, ప్రత్యేక శాఖ ఏసీపీ నాగేంద్ర గౌడ్, సీసీఆర్‌బీ ఇన్‌స్పెక్టర్ అనిల్, ఎస్‌ఐ వినీత తదితరులు పాల్గొన్నారు.