బాలసదనం ప్రారంభోత్సవానికి పకడ్బందీ ఏర్పాట్లు చేయాలి…
పెండింగ్ భూ భారతి దరఖాస్తులను వేగంగా పరిష్కరించాలని అధికారులకు ఆదేశం….
తహసీల్దార్ కార్యాలయాల్లో మధ్యవర్తులకు తావులేదు….
– జిల్లా కలెక్టర్ కోయ శ్రీహర్ష…
సాక్షిత పెద్దపల్లి//జిల్లా ప్రతినిధి:
సుల్తానాబాద్లోని బాలసదనం ప్రారంభోత్సవానికి అవసరమైన అన్ని ఏర్పాట్లను సకాలంలో పూర్తి చేయాలని జిల్లా కలెక్టర్ కోయ శ్రీహర్ష సంబంధిత అధికారులను ఆదేశించారు. మే 29న ప్రభుత్వ విప్, పెద్దపల్లి ఎమ్మెల్యే చింతకుంట విజయరమణారావు చేతుల మీదుగా బాలసదనం ప్రారంభోత్సవం జరగనున్న నేపథ్యంలో ఏర్పాట్లను స్వయంగా పరిశీలించి పలు సూచనలు చేశారు.
సుల్తానాబాద్ మండలంలోని బాలసదనం, వృద్ధాశ్రమం, తహసీల్దార్ కార్యాలయాలను కలెక్టర్ ఆకస్మికంగా తనిఖీ చేశారు. బాలసదనంలో చిన్నారులకు పరిశుభ్రమైన, సురక్షితమైన మరియు సౌకర్యవంతమైన వాతావరణం కల్పించేలా అన్ని చర్యలు తీసుకోవాలని అధికారులకు సూచించారు. నిర్వహణ ప్రమాణాలను ఎప్పటికప్పుడు మెరుగుపరుస్తూ చిన్నారుల సంక్షేమానికి ప్రాధాన్యత ఇవ్వాలని అన్నారు.
అనంతరం వృద్ధాశ్రమాన్ని సందర్శించిన కలెక్టర్ అక్కడి వసతులు, ఆహార నాణ్యత, పరిశుభ్రత తదితర అంశాలను పరిశీలించారు. వృద్ధులకు ఎలాంటి ఇబ్బందులు కలగకుండా అవసరమైన అన్ని సేవలు అందించాలని అధికారులను ఆదేశించారు.
తదుపరి సుల్తానాబాద్ తహసీల్దార్ కార్యాలయాన్ని తనిఖీ చేసిన కలెక్టర్, పెండింగ్లో ఉన్న భూ భారతి దరఖాస్తులను త్వరితగతిన పరిష్కరించాలని సూచించారు. మీ సేవా కేంద్రాల ద్వారా వచ్చే వివిధ ధృవపత్రాల దరఖాస్తులను సకాలంలో పరిశీలించి ప్రజలకు వేగవంతమైన సేవలు అందించాలని అధికారులకు ఆదేశించారు.
ఈ సందర్భంగా తహసీల్దార్ కార్యాలయాల్లో మధ్యవర్తుల ప్రమేయానికి ఎలాంటి అవకాశం ఉండదని కలెక్టర్ స్పష్టం చేశారు. ప్రజలు తమ సమస్యలను నేరుగా అధికారుల దృష్టికి తీసుకురావాలని, పారదర్శకతతో కూడిన ప్రజాసేవలే ప్రభుత్వ ప్రధాన లక్ష్యమని పేర్కొన్నారు.
ఈ పర్యటనలో బి.డబ్ల్యూ.ఓ. వేణుగోపాల్, సుల్తానాబాద్ తహసీల్దార్ బషీరోద్దీన్తో పాటు ఇతర అధికారులు పాల్గొన్నారు.పెండింగ్ భూ భారతి దరఖాస్తులను వేగంగా పరిష్కరించాలని అధికారులకు ఆదేశం.
