ఈఎస్ఐ ఆసుపత్రికి స్థలం కేటాయించాలి….

ఈఎస్ఐ ఆసుపత్రికి స్థలం కేటాయించాలి….

వారం రోజుల్లో చర్యలు తీసుకోకుంటే ప్రత్యక్ష పోరాటం…

జిల్లా కలెక్టర్‌కు బీజేపీ రాష్ట్ర నాయకురాలు సోమారపు లావణ్య వినతి….

సాక్షిత పెద్దపల్లి-జిల్లా ప్రతినిధి, రామగుండం/ :
రామగుండం ప్రాంతంలోని కార్మికులు, పేద ప్రజల వైద్య అవసరాలను దృష్టిలో ఉంచుకుని మంజూరైన ఈఎస్ఐ ఆసుపత్రి నిర్మాణానికి తక్షణమే స్థలం కేటాయించి, నిర్మాణ పనులు ప్రారంభించాలని బీజేపీ రాష్ట్ర నాయకురాలు సోమారపు లావణ్య డిమాండ్ చేశారు. ఈ మేరకు శుక్రవారం జిల్లా కలెక్టర్‌కు వినతిపత్రం సమర్పించారు.

ఈ సందర్భంగా సోమారపు లావణ్య మాట్లాడుతూ.. వేలాది మంది కార్మికులు, వారి కుటుంబాల ఆరోగ్య భద్రతకు ఎంతో కీలకమైన ఈఎస్ఐ ఆసుపత్రి నిర్మాణం విషయంలో ప్రభుత్వం, సంబంధిత అధికారులు నిర్లక్ష్యంగా వ్యవహరిస్తున్నారని ఆరోపించారు. ఆసుపత్రి మంజూరై ఏళ్లు గడుస్తున్నప్పటికీ ఇప్పటివరకు స్థల సేకరణ, స్థల కేటాయింపు ప్రక్రియ పూర్తికాకపోవడం బాధాకరమన్నారు.

కార్మికుల ఆరోగ్య హక్కులను విస్మరించొద్దు
ఈఎస్ఐ ఆసుపత్రి నిర్మాణం ఆలస్యం కావడంతో కార్మికులు, వారి కుటుంబ సభ్యులు నాణ్యమైన వైద్య సేవలు పొందేందుకు ఇబ్బందులు ఎదుర్కొంటున్నారని ఆమె పేర్కొన్నారు.

కార్మికుల ఆరోగ్య అవసరాలకు ప్రభుత్వం అత్యంత ప్రాధాన్యతనిచ్చి ఆసుపత్రి నిర్మాణ ప్రక్రియను వెంటనే ప్రారంభించాలని డిమాండ్ చేశారు.

వారం రోజుల్లో స్పష్టమైన నిర్ణయం తీసుకోవాలి
రాబోయే వారం రోజుల్లోగా ఈఎస్ఐ ఆసుపత్రికి స్థలం కేటాయించి, నిర్మాణ పనులు ప్రారంభించేలా జిల్లా యంత్రాంగం స్పష్టమైన నిర్ణయం తీసుకోవాలని సోమారపు లావణ్య డిమాండ్ చేశారు. వారం రోజుల్లోగా సానుకూల స్పందన రాకపోతే బీజేపీ ఆధ్వర్యంలో తదుపరి కార్యాచరణ ప్రకటించి, కార్మికుల హక్కుల కోసం ప్రత్యక్ష పోరాటానికి దిగుతామని హెచ్చరించారు.

ఈఎస్ఐ ఆసుపత్రి నిర్మాణం కోసం కార్మికులు, ప్రజల తరఫున బీజేపీ నిరంతరం పోరాటం చేస్తుందని స్పష్టం చేశారు. అనంతరం రామగుండం తహసీల్దార్‌కు కూడా ఇదే అంశంపై వినతిపత్రం అందజేశారు.

ఈ కార్యక్రమంలో బీజేపీ ఎస్సీ మోర్చా రాష్ట్ర ఉపాధ్యక్షుడు కాశీపేట శివాజీ, జిల్లా మాజీ ప్రధాన కార్యదర్శి మామిడి రాజేష్, మాజీ జిల్లా ఉపాధ్యక్షురాలు మాతంగి రేణుక, మహిళా మోర్చా జిల్లా అధ్యక్షురాలు వడ్డేపల్లి భారతి, జిల్లా ప్రధాన కార్యదర్శి సుల్వ పద్మ, ఉపాధ్యక్షురాలు సుజా శ్రీ, ఎన్టీపీసీ మండల అధ్యక్షుడు మిట్టపల్లి సతీష్, తిలక్‌నగర్ మండల అధ్యక్షుడు ఐత పవన్, సీనియర్ నాయకులు కొండపర్తి సంజీవ్, కొమ్మ శ్రీనివాస్ యాదవ్, అరిగేల శ్రావణ్ యాదవ్, పశం రాజు యాదవ్, బరిగల సంతోష్, మేడి రాజు, మంథని మహేష్, కచ్చకాయల శ్రావణ్ తదితర కార్యకర్తలు, స్థానిక ప్రతినిధులు పాల్గొన్నారు.